Pastor Baak i Komishon di Santana di Rincon ta rekordá famianan ku djaluna 2 di novèmber 2026 ta Dia di Tur Nos Defuntunan. Ku motibu di e fecha akí, nan ta pidi doñonan di kèlder pa limpia i mantené e área rònt di e lugánan kaminda nan sernan kerí ta sosegá.

Santana ta habrí tur dia, manera ta e kustumber, pa famianan por hasi limpiesa di nan kèlder.

Advertisement

Segun e komishon, kada famia ta responsabel pa mantené su propio kèlder i e 50 sentímeter rònt di dje limpi. Famianan ku no por hasi e trabou nan mes por tuma kontakto ku e komishon pa haña kontakto di persona ku por hasi e limpiesa.

E komishon ta pidi pa depositá sushi di limpiesa den e kontenedor situá na parti suit di Santana, i no laga sushi riba tereno.

Santu Sakrifisio di Misa

Djaluna 2 di novèmber, pa 7or di anochi, lo tin un Santu Sakrifisio di Misa na Misa San Luis Beltran pa tur defuntu.

Personanan ku ke pidi un intenshon di misa pa un defuntu por akudí serka Pastor Baak òf señora Mientje Pourier, djadumingu òf durante di siman despues di misa, pa registrá i paga e intenshon.

Komishon di Santana ta invitá famianan pa sigui kontribuí na mantenementu di e santana, tene e área rònt di nan kèlder limpi i deposita sushi di forma responsabel.