Direktorado di Supervishon i Mantenshon di Lei den kolaborashon ku Fundashon Tienda pa Konsumidó a organisá un anochi informativo spesial pa doñonan di supermerkado dia 20 di òktober último. E enkuentro aki ta forma parti di e proyekto kontinuo “Kontrol na empresanan ku ta bende produktonan alimentisio”, ku ta bou di enkargo di e departamento di Komunidat i Kuido (S&Z) di Direktorado di Supervishon i Mantenshon di Lei.
E meta prinsipal di e anochi tabata pa fortalesé e koperashon ku e empresarionan lokal i atendé huntu ku desaroyonan importante riba tereno di salubridat públiko, higiena, seguridat di kuminda i protekshon di konsumidó.
Splikashon riba lei i reglanan vigente Despues di e palabranan di apertura di sr. Albert Crestian, hefe di departamento di S&Z, i sra. Giovanna Frans, direktor di FTPK, vários eksperto a duna presentashon riba e marko legal ku supermerkadonan mester kumpli kuné:
- Sra. Arlette Martijn a elaborá riba lei di pèrmit di establesimentu i lei di bebida i horeka;
- Sr. Wesley Sint Jago a duna splikashon tokante lei di medio ambiente;
- Sr. Albert Crestian a trata lei di produktonan alimentisio i dekreto di etikèt;
- Sra. Giovanna Frans a sera e seshon informativo ku un charla tokante derecho di konsumidó i komparashon di preis.
Durante tur e presentashonnan a para ketu tambe na e konsekuensianan legal i práktiko na momento ku un establesimentu no ta kumpli ku e reglanan eksistente.

Direktorado di Supervishon i Mantenshon di Lei ta enfatisá ku e kòntròlnan na supermerkadonan lo kontinuá i ta konta ku e koperashon di tur doño di negoshi pa apliká e informashonnan kompartí den práktika.
Kargando komentarionan...