Redakshon di Energia TV a tene un entrevista ku Benito Dirksz, miembro di Konseho Insular pa UPB, tokante e situashon aktual den gobernashon despues di  retiro di Diputado Joselito Statia.

Konsehal Dirksz a deklará ku e gobièrnu aktual ta sigui funshoná di manera normal i stabil. Gezaghèber i e dos Diputadonan ku a keda ta manehándo e karteranan segun marko legal. Segun Dirksz, e partidonan ta trahando pa yega na un diputado nobo pa e periodo ku a sobra.

Durante e entrevista, Dirksz a enfatisá ku e situashon mester keda mirá ku un bista amplio i ku e debate no mester bira un atake personal. Segun Dirksz, e punto prinsipal ta funshonamentu di gobernashon i e responsabilidat di tur partido den e akuerdo di koalishon.

Dirksz a splika ku e programa di mini-gobernashon ta eksigí ku tur tres diputado mester traha komo un tim, ku desishonnan importante ta keda tuma di forma konhunto. El a menshoná ku Partido UPB a hasi esfuerso pa tene reunionnan kada tres luna pa evaluá e akuerdo, pero segun su deklarashon, nan no a risibí kooperashon for di Partido MPB.

Tambe, Dirksz a papia riba e falta di transparensia ku el a mira den e proseso, despues ku a sali na kla ku Sr. Statia a hasi moveshonnan na Hulanda sin konosementu di UPB. Segun Dirksz, un partido den koalishon no por aktua manera un “Llanero Solitario”, i e importansia di komunikashon i kolaborashon ta esensial pa un gobernashon stabil.

Advertisement