Segun informe di EBBEN, tin varios problema i inkonsistensia den e manera ku BECO Bonaire BV a risibí un tereno na Santa Clara pa konstrukshon i operashon di un planta di asfalt.

BECO, un empresa aktivo den konstrukshon, asfalt i trabounan di kaminda, a pidi na yüli 2021 un tereno di 5.000 m² na Santa Clara na erfpacht. E empresa a indiká ku e lugá tabata apropiá pa “zware bedrijven” (industria pisa).

Na febrüari 2022, un konseho interno den OLB a rekomendá pa duna BECO no solamente 5.000 m², sino un tereno di 14.232 m². Segun e informe, no a bira kla kiko a motivá e oumento grandi den grandura di e tereno. Tambe no tabata kla kua tereno eksakto tabata na diskushon.

E informe ta señalá ku durante e proseso no a sigui e reglanan di e asina yamá “Didam-arrest”, un desishon importante di Hoge Raad na Hulanda ku ta obligá gobièrnu traha ku mas transparensia ora nan ta repartí tereno públiko.

Na novèmber 2022, OLB a publiká ku nan a aprobá entrega di un tereno na Santa Clara pa BECO pa konstrukshon di un planta di asfalt, depósito i otro fasilidatnan. Mas despues, na yüli 2023, e tereno 5-E-107 di mas o ménos 12.000 m² a wordu ofisialmente entregá na erfpacht.

E informe ta bisa ku na e momento ei e destinashon di e tereno tabata kambiá temporalmente pa “Bedrijventerrein – Zware bedrijven”. Pero na novèmber 2023, un hues a anulá e kambionan den bestemmingsplan i e destinashon original “Agrarisch-Kunuku” a bolbe apliká.

Esaki a krea un problema legal, pasobra e aktividatnan di un planta di asfalt no ta permití bou di e destinashon agríkola. Segun e informe, apesar di esaki, e planta di asfalt ya tabata operashonal ora ku BECO a entregá un petishon pa permiso ambiental na desèmber 2025.

Investigadónan a indiká ku nan no a haña prueba ku e petishon pa permiso ambiental a wordu tratá ofisialmente. Segun e informe, esaki posiblemente ta pasobra e aktividatnan pa kua e permit a wòrdu pidí no ta permití segun e bestemmingsplan aktual.

E informe takonkluí ku un situashon di impase a surgi: OLB a otorgá tereno na un empresa pa aktividatnan ku despues no por wordu legalisá segun e destinashon vigente di e tereno.

Advertisement