Ku solamente dos siman pa e Regatta kuminsá, Massive Productions a presentá e programa pa parti anochi di Festival di Regatta, ku ta selebrá su 59 aniversario e aña aki. Durante un konferensia di prensa 28 di sèptèmber, representante di Massive Productions, Jiwan Gonesh, a duna mas informashon tokante e diferente aktividat ku ta forma parti di e programa. Indebon, Skal i TCB i Gobièrnu di Boneiru ta partnernan prinsipal di e evento.

Regatta di laman

Durante e konferensia di prensa, Gerrald Victorina a duna informashon tokante e Regatta di awa, ku ta organisá pa Aquaspeed. Inskripshon pa kompetensianan maritimo a kuminsá kaba. Registrashon ta habri for di 11 or di mainta, 11 di òktober. E apertura ofisial di e karedanan ta tuma lugá e mesun dia pa 6 or di atardi.

Advertisement

Dia 12, 13 i 14 di òktober lo tin kareda di awa, ku diferente kategoria i disiplina, entre nan bela, microboat, foil i windsurf. Ademas, tur atardi entre 5 i 7 or lo tin happy hour komo parti di e programa.

Un di e kambionan mas grandi pa e edishon aki ta lokashon di e main stage. E esenario prinsipal lo muda pa Centrumgebied.

Den e area di parkeer na BC lo tin food trucks i mesanan kaminda bishitantenan por sinta i kome. Riba di Wilhelmina lo tin un area pa artesania, mientras ku dilanti di El Mundo lo tin un kids corner pa muchanan. E stage di Keinta Kaya lo ta riba e parkeer di BC, ku e parti dilanti mirando pa BC i e parti tras mirando pa Passangrahan.

Keinta Kaya for di 11 te 13 di òktober

E programa di Keinta Kaya ta kuminsá dia 11 di òktober ku Umoja di Kòrsou, un grupo di Seu. Dia 12 di òktober, Rincon Boys ta subi esenario, mientras ku dia 13 di òktober públiko por disfrutá di Hashtag, Palu Grandi JC & Friends i Zjeitu di Aruba.

For di 14 di òktober, e atenshon ta move pa e main stage. E main acts pa e diferente anochi ta:

• 14 di òktober: Poke
• 15 di òktober: Jeon
• 16 di òktober: Cache Deluxe
• 17 di òktober: Freddy Moreira i One Flavaz

Komo parti di e programa, djasabra lo tin un Boat Party di 10 or di mainta te 6 or di atardi. MC Christrix i DJ Crox lo ta responsabel pa e entretenimento musikal durante e evento.

Ku e programa aki, e organisadónan ta prepará pa un siman yen di aktividat, musika, deporte i entretenimiento, mientras ku Regatta ta selebrá su di 59 aniversario.