Frakshon di M21 a manda un karta pa presidente di Konseho Insular, indikando ku e ta distansiá su mes di e kontenido, tono i konklushonnan di e karta ku frakshon di UPB a manda resientemente pa Tweede Kamer, Raad van State i otro instansianan di gobièrnu na Hulanda.

E polémika aki a surgi despues ku Sekretario di Estado pa Relashonnan di Reino a manda korespondensia pa Gezaghèber di Boneiru tokante señalnan di instabilidat polítiko i posibel metementu polítiko den e aparato gubernamental.

Segun M21, den e struktura konstitushonal di Hulanda Karibense, gobièrnu hulandes tin un responsabilidat di garantisá bon gobernashon, estado di derechi, integridat i maneho públiko adekuá. E responsabilidat aki ta derivá direktamente di e posishon di Boneiru komo entidat públiko di Hulanda.

M21 ta enfatisá ku ta nesesario ku ora surgi señalnan di instabilidat òf metementu polítiko den e aparato gubernamental, instansianan di Reino ta tuma esaki na serio i hasi un investigashon kuidadoso. Den e kuadro aki, M21 ta enfatisá ku manifestashon di preokupashon pa parti di un Sekretario di Estado no por wòrdu mirá simplemente komo un metementu inaseptabel den e outonomia lokal.

Frakshon M21 a stipulá ku outonomia i supervishon no ta kontra di otro, sino nan ta komplementá otro. E outonomia di un entidat públiko ta bini ku su propio responsabilidatnan, miéntras ku Reino ta keda obligá na vigilá pa e prinsipionan di bon gobernashon i seguridat hurídiko.

Mas aleu den e karta, M21 ta ekspresá ku akusashonnan dirigí kontra instansianan nashonal sin un bon fundeshi no ta kontribuí na solushoná e retonan ku Boneiru ta konfrontando. Kontrario na esei, e tipo di ekspreshonnan aki por mas bien kousa daño na e konfiansa den e institushonnan públiko i stroba e kooperashon nesesario entre outoridatnan lokal i esnan di Reino.

E frakshon ta retirá su sosten, i ta enfatisá riba un aparato gubernamental profeshonal, independiente i eksperto ku ta ehekutá su trabou sin preshon polítiko. Segun M21, kualke duda òf keho tokante influensia polítiko òf integridat mester wòrdu evaluá abase di echonan ophetivo, análisisnan independiente i e proseduranan legal.

Pa konkluí, M21 ta hasi un aklarashon struktural: e karta emití pa UPB ta un posishon puramente partidario i no un desishon òf posishon ofisial di Konseho Insular (Eilandsraad) di Boneiru. E frakshon di UPB no por papia na nòmber di Konseho Insular ni na nòmber di Entidat Públiko Boneiru, ya ku e tema no a wòrdu debatí ni votá den un reunion públiko di representashon di pueblo.

M21 ta hasi un yamada na tur polítiko pa atendé e retonan di gobernashon ku debido seriedat, di un manera responsabel, segun ordenamentu demokrátiko i semper pensando na bienestar di e poblashon.

Advertisement