Frakshon Serberie a publiká un komunikado den kua nan ta ekspresá preokupashon tokante falta di konfiansa den polítika despues di desaroyonan resiente den gobièrnu i retiro di diputado Joselito Statia.

Den e komunikado, frakshon Serberie ta bisa ku e situashon a krea inseguridat den komunidat i ku den koalishon ta bai intensivamente den konsulta pa yega na un solushon ku lo permití kontinuidat di gobièrnu te ku mart 2027.

E frakshon a indiká ku semper tabatin un bon kolaborashon ku diputado Joselito Statia i ku nan ta lamentá su retiro. E komunikado ta bisa ku, segun nan, e motibu prinsipal ta relashoná ku komunikashon i kolaborashon den koalishon. Frakshon Serberie ta bisa ku nan ta kere ku esaki por keda mehorá dor di akuerdonan kla tokante komunikashon, responsabilidat i ekspektativanan, ku respèt mutuo i profeshonalismo.

Di otro banda, Joselito Statia a informá redakshon di Energia Tv, ku petishon pa e laga su funshon no a keda komuniká direktamente dor di e koalishon sino pa medio di lider interino di partido UPB Jolinda Craane, kaminda Jolinda a inform'é ku e no tin sosten mas di frakshon di UPB. Esaki a keda rekonfirmá  pa medio di un yamada di telefòn kaminda konsehal James Kroon ta indiká ku kosnan no tabata bai masha. Segun Joselito Statia falta di sostén kompletu di e koalishon ta motibu sufisiente pa el a entregá su retiro. 

No tin indikashon ku e otro dos parternan (MPB i Serberie) den koalishon tabata deseá retiro di Joselito Statia.

Frakshon Serberie a sera su komunikado ku un yamada pa responsabilidat i stabilidat, indikando ku bienestar di pueblo mester keda sentral den tur desishon i ku nan ta spera ku pronto lo por informá komunidat tokante e siguiente pasonan den koalishon.

Advertisement