Fundashon Mariadal a para ketu 12 di mei, riba dia di enfermeria. Labor di enfermeria ta representá un pila fundamental pa e sistema di salubridat general, kaminda kombinashon di atenshon i kompromiso personal ta permití ku pashèntnan i habitantenan ta risibí kuido esensial ku nan tin mester segun Giovanni Frans, miembro di hunta di direktiva di Fundashon Mariadal.

Frans a para ketu na e nifikashon profundo di e fecha aki, resaltando e sakrifisio diario ku profeshonalnan di kuido ta hasi pa garantisá e bienestar di esnan ku ta interná òf ku ta bishitá e instansia di salubridat pa otro motibu.

Segun e, e labor aki ta bai hopi mas ayá ku simplemente un relashon laboral òf ehekushon di tareanan rutinario. Frans a deskribí e profeshon komo esfuerso humanitario i dedikashon, deskribiendo e kompromiso aki komo e faktor ku ta definí e kalidat di servisio ku ta duna na pashèntnan den momentonan di mas vulnerabel.

Personal di enfermeria na Fundashon Mariadal, meskos ku esnan rònt mundu, ta enfrentá retonan konstante pa loke ta outoridat di tempu i eksigensianan físiko i emoshonal ku e trabou ta trese ku né. Frans a visualisá e realidat aki i a duna rekonosementu outéntiko na e echo ku hopi biaha e profeshonalnan aki ta hasi sakrifisionan personal pa por kumpli ku nan deber.

Diputado Timoteo Silberie tambe tabata presente i duna un diskurso kòrtiku mandando un pabien kaluroso na tur enfermero i enfermera riba nan dia spesial, kaminda el a resaltá e importansia di tin un personal empoderá pa por salba bida.

Den su diskurso, Silberie a enfatisá ku empoderashon ta e forsa interno ku ta permití e profeshonalnan realisá nan labor diario ku pashon i dedikashon.

E mandatario a duna rekonosementu na e ròl fundamental ku personal di enfermeria tin den e sistema di salubridat, suprayando ku nan esfuerso i outoridat den nan trabou ta primordial pa kuido i supervivensia di pashèntnan.

Advertisement