Staatssecretaris di Binnenlandse Zaken en Koninkrijksrelaties, Eric van der Burg, a pidi Gezaghèber di Boneiru pa presentá un informe detayá tokante medidanan ku Kolegio Ehekutivo a tuma pa garantisá kontinuidat di gobernashon i fortalesé e aparato públiko.

Den un karta ku ta data 24 di september 2026, Van der Burg ta indiká ku e ta sigui e situashon polítiko-atministrativo na Boneiru ku hopi atenshon. E ta bisa ku e ta seriamente preokupá pa krisisnan di gobernashon ku ta sigui otro i pa inestabilidat polítiko ku ta akompañá nan.

Advertisement

Segun e staatssecretaris, e situashon aki, huntu ku señalnan di posibel interferensia polítiko den e organisashon, por pone kontinuidat di gobernashon i ehekushon di dossiernan importante bou di preshon.

Atenshon pa kontinuidat te despues di elekshon

Van der Burg ta referí na elekshonnan di Konseho Insular ku ta tuma lugá 17 di mart 2027. El a indiká ku no ta posibel pa adelantá kua lo ta e efektonan di elekshon riba gobernashon di Boneiru. Sinembargo, mester evitá ku e periododi awor te ku un Kolegio Ehekutivo nobo forma, lo bira un periodo di paralisis.

E ta pidi Kolegio Ehekutivo pa splika kiko nan ta bai hasi pa garantisá progreso den dossiernan importante. Esaki ta inkluí implementashon di e akuerdonan den Bestuursakkoord Bonaire 2024–2027 i Uitvoeringsagenda. Entre e temanan ku ta forma parti di e akuerdo tin Regio Deal, bestuursovereenkomst ku Selibon, Transporte públiko i e plan pa garantisá progeso finansiero.

Preokupashon tokante interferensia polítiko

Un otro punto importante den e karta ta señalnan di posibel interferensia polítiko den e aparato públiko. Van der Burg ta referí na un karta ku Gezaghèber a manda pa Konseho Insular riba 10 di ougùstùs. Segun Van der Burg, e aparato mester por hasi su trabou ku un sierto grado di independensia i interferensia polítiko den e organisashon no ta kompatibel ku esaki. E ta agregá ku e situashon por tin konsekuensia pa seguridat sosial di e empleadonan. 

Den e karta, Van der Burg ta rekordá ku, bou di artíkulo 172 di e Wet openbare lichamen Bonaire, Sint Eustatius en Saba (WolBES), Gezaghèber tin e tarea pa promové integridat di gobernashon públiko. Gezaghèber tin un ròl importante den vigilá relashonnan di gobernashon, komo presidente di Kolegio Ehekutivo i Konseho Insular.

Tres punto ku Gezaghèber mester kontestá

Van der Burg ta pidi Gezaghèber, mediante un "bericht en raad" segun artíkulo 213 di WolBES, pa duna informashon riba tres área:

1. Kontinuidat di gobernashon
E ta pidi pa indiká kua medida konkreto Kolegio Ehekutivo ta tuma pa garantisá progreso den dossiernan te ora un Kolegio Ehekutivo nobo forma. Tambe mester splika kon e progreso di e akuerdonan ku Hulanda ta keda monitoreá.

2. Bon gobernashon i fortalesementu di aparato públiko
Kolegio Ehekutivo mester presentá un plan ku medida di korto plaso pa fortalesé e organisashon di ambtenar i prevení interferensia polítiko. Den esaki mester keda kla kua ekspertisio adishonal ta nesesario, kon ta atraé e ekspertisio i kon eventualmente lo monitoreá interferensia polítiko.

3. Sosten di Hulanda
Staatssecretaris ta indiká ku su ministerio ta dispuesto pa duna sosten, unda esaki ta nesesario i deseá. P'esei e ta pidi Boneiru pa indiká si tin nesesidat pa sosten adishonal di Reino.

Reunion na Boneiru den òktober

Van der Burg a indiká ku e lo evaluá e reakshon di Gezaghèber. Durante su bishita di trabou na Boneiru den òktober, ta plania pa papia ku Gezaghèber i ku henter Kolegio Ehekutivo tokante eventual pasonan siguiente. E meta, segun e karta, ta pa sigui fortalesé kontinuidat di gobernashon i ehekushon di trabou públiko.

Staatssecretaris ta sera ku e speransa ku den e siguiente periodo, Kolegio Ehekutivo lo tuma e pasonan nesesario pa mustra ku gobernashon di Boneiru ta konsentrá riba interesnan di su habitante i riba e retonan ku e isla ta enfrentá.