Gobièrnu di Aruba a manifestá su solidaridat profundo ku e pueblo venezolano tras di temblornan fuerte ku a afektá Venezuela, kousando numeroso víktima i daño material konsiderabel, partikularmente den region di La Guaira.

Desde oranan trempan di mainta, Promé Minister Mike Eman a konvoká un reunion ku direktor di Crisis Management Office (CMO), Rino Hermans, Altokomisario di Polis (KPA) Ramon Arnhem, i Susan de Lange di Veiligheidsdienst Aruba (VDA) pa asina evaluá e situashon i koordiná e promé pasonan.

Posteriormente, Gobièrnu a establesé komunikashon ofisial ku Konsul di Venezuela na Aruba, Embahadora di Reino Hulandes na Caracas, Carmen Gonsalves, i instansianan korespondiente den Reino pa optené informashon aktualisá i determiná e forma mas efektivo pa brinda sosten.

Promé Minister Mike Eman a deklará: "Nos ta ekspresá nos solidaridat ku e nashon i komunidat di Venezuela, reafirmando boluntat di Aruba pa asistí via ousilio humanitario."

Informashon risibí ta indiká ku La Guaira ta un di e zonanan mas afektá i ku sifra di fayesidonan ku ta oumentando. Te na e momentu nan akí, no tin raportahe di siudadano arubiano afektá. 

Aruba ta mantené kontakto estrecho ku e outoridatnan di Reino pa definí ayudo spesífiko pa Venezuela, basando esaki riba eksperensia previo di e isla den asistensia humanitario, manera mishon na Haiti despues di temblor di 2010.

Pa konkluí, Promé Minister Eman a ekstendé su solidaridat na komunidat venezolano residente na Aruba, rekonosiendo e angustia i insertidumbre ku famianan ta enfrentá.

Advertisement