Papiamentu
Grupo di Diálogo tokante Pasado di Sklabitut na Boneiru a manda un karta públiko na minister-presidente di Hulanda despues ku Reino Hulandes a abstené durante votashon den Asamblea General di Nashonnan Uní riba 25 di mart 2026 tokante un resolushon relashoná ku komèrsio transatlántiko di katibu i e krímenanan kometí kontra hende ku tabata den sklabitut.
E resolushon, liderá pa Ghana, a deklará tráfiko transatlántiko di katibu i sklabitut rasialisá di hende Afrikano komo “e krimen mas grave kontra humanidat” i a hasi yamada pa reparashon, diskulpa ofisial i restitushon di patrimonio kultural. E resolushon a pasa ku 123 voto na fabor, 3 kontra i 52 abstenshon, inkluyendo Reino Hulandes ku a abstené. 
Segun grupo di dialogo, e abstenshon hulandes ta lanta preguntanan fundamental pa loke ta trata representashon di Boneiru i e otro partinan karibense di Reino den kuadro di tumamentu di desishon internashonal.
Entre otro, e Grupo di Diálogo ta pidi gobièrnu splika:
- Kon kordinashon a tuma lugá denter di Reino;
- Kua posishonnan a wòrdu trese dilanti dor di e islanan Karibense;
- Dikon a tuma e desishon pa no sostené e resolushon;
- i ki ora promesanan anterior tokante reparashon, konmemorashon i lucha kontra e efektonan kontinuo di pasado di sklabitut lo wordu ehekutá konkretamente.
Grupo di dialogo ta deklará ku hopi promesa hasí dor di gobièrnu hulandes pa loke ta trata rekonosementu i reparashon no a wòrdu realisá visiblemente ainda na Boneiru.
“E votashon den Nashonnan Uní a kousa desepshon profundo i preokupashon den parti di komunidat boneriano,” segun Grupo di Diálogo. “Pasado di sklabitut no ta un kapítulo será; su konsekuensianan sosial i ekonómiko ta sigui te awe.”
E karta a wòrdu firmá na nòmber di Grupo di Diálogo riba Historia di Sklabitut Boneiru dor di koordinadó Arthur Sealy i a wòrdu hasí públiko.
Grupo di Diálogo ta spera un reakshon rápido di gobièrnu Hulandes.
Kargando komentarionan...