Dia 26 di mei último, e grupo di proyekto Plan di Klima Boneiru, bou di presidensia di Nolly Oleana, a entregá un Plan di Klima  na Kolegio Ehekutivo. E plan akí, titulá ‘Nos isla, nos responsabilidat’, ta resultado di un trayekto intensivo ku a kuminsá na ougùstùs 2024 ku sosten amplio di komunidat.

Durante e trayekto, a traha huntu ku habitante, empresa, organisashonnan sosial, kunukero i piskadónan pa asina prosesá nan preokupashon i deseonan direktamente den e plan.

E konsekuensianan di kambio di klima, manera subida di temperatura, sekura, eroshon di kosta i blikiamentu di koral, ya ta visibel diariamente na Boneiru. Pa e motibu akí, e plan ta enfoká riba kuater punto prinsipal:

• Siguridat di awa
• Protekshon di ekosistemanan
• Desaroyo teritorial sostenibel
• Siguridat di kuminda

E grupo di proyekto a enfatisá ku mester duna pasonan direkto awor pa pasa di plan pa ehekushon, pa evitá retraso. Esaki ta eksigí un bon kolaborashon tantu entre mandatarionan lokal i e ministerionan na Hulanda.

Riba término kòrtiku lo organisá un seshon di fitbèk pa e komunidat, kaminda lo splika e kontenido di e plan i informá habitantenan tokante e siguiente pasonan.

Presidente Nolly Oleana ke gradisí tur persona ku a kontribuí na e plan aki indikando ku netamente e kompromiso kompartí akí ta duna konfiansa ku Boneiru por atendé ku e desafionan di futuro.

Advertisement