Den un entrevista, Hennyson Thielman a duna di konosé ku èks diputado Joselito Statia a logra pone un fondo di $64 mion pa invertí direktamente den infrastruktura i mehorashon di kalidat di bida. E invershon aki ta dirigí na mehorá kamindanan prinsipal di Boneiru i atendé skarsedat i retraso den entrega di tereno ku ta persistí for di aña 2010.

Un di e proyektonan di mas grandi lo ta renobashon kompleto di e ruta ku ta konektá Rincon i Playa. E kaminda aki, ku ta wòrdu usá diariamente pa hopi outomobilista, lo risibí trabounan di mehorashon i un kapa nobo di asfalt pa garantisá seguridat di koredónan di outo.

Ademas di e kaminda di Rincon, lo bai tin un enfoke profundo den sentro di siudat i bisindarionan. Zonanan krítiko manera Kaya Grandi i áreanan situá parti tras di dje (hanchi di Subway) ku pa hopi aña ta kousa molèster i problemanan struktural ora di yobida intenso, lo wòrdu kompletamente renobá dunand'e un aspekto nobo i moderno.

Banda di e kareteranan, e presupuesto di $64 mion aki tambe lo sirbi pa atendé un di e nesesidatnan di mas grandi den nos pueblo ku ta disponibilidat di tereno. Sr. Thielman a splika ku despues di mas di 10 aña di warda, e proseso pa hasi tereno disponibel a keda pone komo prioridat.

Aktualmente ta identifikando terenonan adishonal pa por desaroyá barionan nobo, permitiendo ku hopi famia ku ta riba lista di espera pa hopi tempu por toka turno pa haña un tereno pa traha nan propio kas.

E trabounan lo kuminsá pronto den diferente área, i e departamento di gobièrnu lo keda informá komunidat miéntras ku e proyektonan ta avansá.

Advertisement