Papiamentu
Djádumingu 17 di mei, alrededor di 10’or di anochi, polis a risibí varios notifikashon tokante un grupo di mucha menor di edat ku tabata kometé aktunan di baldadi den Bario Santa Rosa i kousando molèster pa habitantenan di e área.
Segun informashon di polis, e hóbennan tabata tira piedra i webu riba outo i kasnan. Tambe a wordu reportá ku nan a kousa destrukshon na algun tayer di outo den bario.
Ora polis a yega na e sitio, a papia severamente ku algun di e muchanan, i tambe ku algun mayor ku tabata presente. Polis a indiká ku tabata remarkabel ku varios di e muchanan no tabata bou di supervishon di nan mayor, apesar ku tabata ya anochi lat.
Ademas, segun polis, algun mayor no a mustra hopi interes pa dialogá ku polis tokante e komportashon di nan yu.
Polis di bario a deklará ku nan lo sigui monitoriá e situashon i intensifiká vigilansia den e área pa prevení mas molèster i destrukshon.
Kargando komentarionan...