Papiamentu
Un hòmber di 51 aña di edat a keda detené den oranan tempran di djabièrnè mainta 26 di yüni, despues ku, segun polis, el a nenga di sigui òrdu pa bandoná un área kaminda tabata tin tenshon entre algun persona.
Segun informashon di polis, alrededor di 2:00 di mardugá un patruya a yega na un establesimentu di hóreka na Kaya Bonaire, kaminda un alterkashon a keda konstatá entre diferente persona. Agentenan a intervení pa separá e gruponan i evitá ku e situashon ta eskalá.
Despues ku e situashon a bira mas kalmo i hende a kuminsá bandoná e sitio, polis a nota ku un hòmber tabata sigui buska konfrontashon ku un otro persona. Pa prevení mas problema, e hòmber a risibí diferente òrdu pa bandoná e área.
E sospechoso no a obedesé òrdu. Pa motibu di esaki, alrededor di 3:00 di mardugá, agentenan a detené e hòmber, identifiká ku inisialnan J.G.M., pa no sigui òrdu di polis i buracheria públiko.
Durante e detenshon, polis a informá ku e sospechoso a resistí, purba di oponé su aresto i a dirigí menasanan na un agente. Tambe, segun e informe, el a intentá pa kita arma di kandela di e agente for di su holster. E intento no a logra, i e arma a permanesé seif.
Kargando komentarionan...