Un kantidat grandi di hende a reuni djabièrnè atardi pa mira aterisahe di un avion di karga Boeing 747 ku a trese un motor di remplaso pa avion di KLM ku ta para na Boneiru desde 21 di sèptèmber.

Yegada di e avion a kousa hopi tráfiko riba EEG Boulevard. Despues di aterisá, e motor a keda transportá pa e avion di KLM riba plataforma di aeropuerto, kaminda tèknikonan a kuminsá mesora ku e trabounan di remplaso.

Advertisement

Ainda no ta konosí ki ora e trabounan lo finalisá ni kua dia e avion lo por bolbe den servisio. Pasaheronan di e buelo original pa Amsterdam ya a wordu transportá ku otro buelonan.

Queen of the Skies

E Boeing 747 ta konosí mundialmente komo "Queen of the Skies" (Reina di e Shelu), un nòmber di kariñao ku e avion tin pa motibu di su grandura, su diseño úniko ku e "hump" dilanti, i e ròl importante ku el a hunga den aviashon mundial durante mas ku 50 aña. Boeing mes ta referí na e 747 komo "Queen of the Skies". 

Aworaki, mayoria di e 747nan ku ta sigui bula den servisio di karga (cargo), pasobra hopi kompania a retirá nan flota di pasahero. E modelo ku a yega Boneiru tabata un 747 cargo, usá pa transportá karga grandi manera motornan di avion.