Polítiko i eks-diputadó, James Kroon, a reakshoná fuertemente riba último deklarashonnan di Hennyson Thielman, kalifikando esaki nan komo difamatorio i leu for di un estilo profeshonal. Kroon a nengá e akusashonnan redondamente i a sali na defensa di e trayektoria, tim, i stabilidat di partido UPB.

Kroon a enfatisá ku UPB ta un partido di resultado i kier rekòrda komunidat riba madures polítiko ku e partido a demostrá den pasado. Komo ehèmpel, el a splika e motibu pakiko gobièrnu anterior di koalishon entre UPB i MPB a dura e kuater aña kompletu (2019–2023). Segun Kroon, maske a kosta hopi esfuerso pa wanta sierto kosnan interno, semper e interes general di e komunidat di Boneiru a bini na promé lugá, lokual a permití nan goberná te na final di e término.

Mirando e krítikanan resien, Kroon a duna un mensahe di konfiansa den direkshon aktual di e organisashon. El a deklará ku UPB ta duna un sosten di 100% na su lider interino, Jolinda Craane, mustrando ku e partido ta uní i solidario.

Ademas, e polítiko a nengá redondamente ku e partido a debilitá, afirmando ku UPB tin un ekipo bon prepará, ku eksperensia i kapasitá pa asumí kualke reto ku bini dilanti. Kroon a sera su deklarashon mustrando gran optimismo pa futuro, fihando atenshon riba e sanger nobo ku ta drentando den UPB.

Advertisement