Jeffrey Levenstone, miembro di direktiva di Union Patriótiko Boneriano (UPB) i konsehero di diputado Jennifer Mohamedjoenoes, a sali na defensa di lider polítiko interino di partido, Jolinda Craane, despues di kritikanan ku a surgi tras di retiro di diputado Joslito Statia.

Den un komunikado, Levenstone a rechasá loke e ta konsiderá komo atakenan “brutal i infundá” dirigí kontra tantu UPB komo Jolinda Craane. Segun e, e reakshonnan aki no ta basa riba tur echo relashoná ku e situashon ku a kondusí na retiro di e miembro di Kolegio Ehekutivo.

Levenstone a argumentá ku diferente komentario i akusashonnan ta reflehá un estilo di politika ku ta pertenesé na un pasado ku no ta kontribuí na progreso ni renobashon den arena polítiko lokal. El a bisa ku e bèrdat tokante e sirkunstansianan rondó di e diputado su retiro eventualmente lo sali na lus.

Levenstone a deskribí e lider polítiko interino di UPB komo un representante di un vishon nobo pa Boneiru. Segun Levenstone, Craane ta enfoká pa elevá nivel di bida, fortalesementu di identidat boneriano, union sosial i desaroyo ekonómiko pa e komunidat.

Levenstone a enfatisá ku den su kapasidat komo miembro di direktiva di UPB, e ta sostené plenamente liderasgo di Jolinda Craane i direkshon ku e partido ta sigui. El a indiká ku, na su opinion, Boneiru mester mira pa dilanti i enfoká riba oportunidatnan pa futuro enbes di keda pegá den konfliktonan polítiko di pasado.

Advertisement