Justitiële Inrichting Caribisch Nederland (JICN) a lansa kampaña “Mas tras di nos muraya”, ku tin komo ophetivo pa duna komunidat un bista mas amplio di trabounan di reintegrashon i resosialisashon ku ta tuma lugá den prizòn na Boneiru.

Segun Anna Domacassé di JICN, e kampaña aki ta enfoká no solamente riba aspektonan di seguridat i mehorashon di e institushon, sino prinsipalmente riba desaroyo personal di klientenan (prizoneronan) durante nan trayekto di detenshon.

Advertisement

E programa ta brinda guia riba tereno sosial emoshonal, edukashonal i laboral pa yuda detenidonan krese i prepará pa nan regreso den sosiedat. Entre e oportunidatnan ku ta wòrdu ofresé tin:

• Oportunidat di Estudio: Detenidonan ta haña guia pa logra diploma di MBO 1 i MBO 2, huntu ku diferente sertifikado profeshonal;
• Proyektonan Práktiko: Un proyekto di agrikultura ku un greenhouse kaminda nan ta siña teoria i téknikanan di plantamentu;
• Formashon den Trabou: Kapasitashon den ofishinan di man manera karpinteria, mètsla i las;
• Preparashon pa Trabou: Guia pa traha nan CV, siña solisitá i prepará pa drenta merkado laboral bèk.

Domacassé a enfatisá e orguyo di mira resultadonan di esfuerso. Vários èks detenido ku a sali den libertat ta trahando aktualmente den sektor di hotel i tin otro ku a habri nan propio negoshi.

JICN lo keda duna komunidat un bista di e trabou interno ku ta keda realisá atrabés di video i imágennan.