Jolinda Craane ta asistí na kongreso 2026 di AVP na Aruba

Gobernashon i Polítika

Jolinda Craane ta asistí na kongreso 2026 di AVP na Aruba

Pa AC 02 Oct, 2026 5 Min Lesa 51 Bishitante

Lider interino di Union Patriotiko Boneiriano (UPB), Jolinda Craane, a yega Aruba pa asisti na Kongreso 2026 di Partido AVP, ku lo tuma lugá diadomingo 4 di òktober na Aruba Marriott Resort Grand Ballroom.

Craane a keda risibí pa lider saliente di AVP i ex-Prome Minister Mike Eman, futuro lider di AVP i Minister di Turismo, Transporte i Labor Wendrick Cicilia, i kandidato di AVP Sonaly Fernandez-Acosta.

Su presensia na Aruba ta koinsidí ku un periodo di transishon den AVP, kaminda e partido ta prepará pa un kambio di liderato. UPB na Boneiru tambe ta den un proseso di renobashon interno.

Jolinda Craane lider interino di UPB na Aruba pa kongreso di partido AVP

Durante e enkuentro, Mike Eman a señalá ku AVP i UPB ta mantené un relashon di hopi aña i ku tur dos partido ta kompartí un base kristian-demokrátiko. Segun dje, e relashon entre e dos organisashonnan a desaroyá durante hopi aña di kontakto i koperashon.

Eman a indiká ku tanto AVP komo UPB ta den un etapa di renobashon i ku e reto ta pa kombiná ideanan nobo ku e prinsipionan ku a forma e fundashon di nan respektivo partido. El a destaká tambe e relashon históriko entre Aruba i Boneiru i a referí na e lasonan familiar di futuro lider di AVP, Wendrick Cicilia, ku Boneiru.

Na su banda, Jolinda Craane a ekspresá su apresio pa e invitashon i a menshoná ku UPB tambe ta pasando pa un proseso di renobashon. Segun Craane, e meta ta pa sigui desaroyá e partido, manteniendo e balornan ku a gui'é durante añanan.

Wendrick Cicilia a duna Craane bon biní na Aruba i a destaká e relashon eksistente entre AVP i UPB. El a señalá ku tur dos partido ta kompartí sierto balornan i ku tin interés pa sigui mantené kontakto entre e dos organisashonnan.

Sonaly Fernandez-Acosta tambe a risibí Craane i a enfatisá e importansia di interkambio di eksperensia entre personanan aktivo den polítika.

Kongreso 2026 di AVP lo tuma lugá djadumingu 4 di òktober na Aruba Marriott Resort Grand Ballroom, kuminsando pa 9or di mainta. Durante e kongreso, e partido lo reuní su miembro i simpatisantenan den un momento importante pa su futuro liderato.

Lider di Partido Nashonal di Pueblo (PNPD) di Kòrsou, Ruthmilda “Mimi” Larmonie-Cecilia, tambe ta na Aruba pa asisti na Congreso 2026 di Partido AVP, ku lo tuma lugá dia 4 di òktober na Aruba Marriott Resort Grand Ballroom.

Minister i futuro lider di AVP mr. Wendrick Cicilia tambe a resaltá e historia kompartí entre AVP i PNP. Segun Cicilia, ambos partido a desempeña un ròl importante den desaroyo di Aruba i Korsou i tin raisnan ideologiko i pensamentonan ku durante hopi aña a aserka nan na otro.