Kachónan ta ataká i mata diferente bestia na kunuku den area di Bara di Karta

Lokal

Kachónan ta ataká i mata diferente bestia na kunuku den area di Bara di Karta

Pa LJ 10 Aug, 2026 5 Min Lesa 4 Bishitante

Kunukero Shirmel Elizabeth, mihó konosí den komunidat komo "Papito Kuifje", a lanta un bos i pidi yudansa urgente di outoridatnan debí na atakenan feros di kachó ku a mata vários di su bestianan na su kunuku situá na Bara di Karta. E situashon aki a kousa un gran dolor i preokupashon na e kunukero, kende ta mira e trabou di henter su bida i su fuente di entrada keda bou di menasa.

Entre e bestianan ku a keda matá pa e kachónan aki tin vários di su konènchinan. Segun detayenan ku Sr. Elizabeth a kompartí, a logra identifiká un kachó koló maron ku blanku ku ta kousando problema den e zona. E pèrdida aki a trese un gran tristesa i lamento pa e kunukero, kende ta mirando kon un historia doloroso ta ripití su mes, rekordando ku na aña 2010, atakenan similar di kachó a pon’e pèrdè tur kos.

Maske sr Elizabeth ta sufriendo di problema di salú na su rudia ku ta hasi movementu difísil, e ta sinti su mes obligá pa pasa anochi na su kunuku pa vigilá i protehá bestianan ku a keda, spesialmente durante oranan di mardugá ora e atakenan ta tuma lugá.

Mirando gravedat di e situashon i peliger ku esaki ta representá pa tur kunukero den e área, bisiñanan di Bara di Karta a disidí di uni forsa. Nan a krea un grupo di WhatsApp pa keda na altura di kualke movementu sospechoso, alertá otro rápido i duna e apoyo nesesario na otro.

Apesar di e inisiativa di bisiñanan, "Papito Kuifje" ta enfatisá ku e solo esfuerso lokal aki no ta sufisiente. El a hasi un yamada direkto pa outoridatnan kompetente pa aktua ku urgensia i tuma medidapa frena e atakenan aki inmediatamente, garantisá trankilidat i seguridat di e kunukeronan i nan bestianan na Bara di Karta.