Den e temporada aki di aña, e chèns pa kontagiá ku grip ta oumentá konsiderablemente. Segun un komunikado ku a keda emití, GGD Boneiru ta indikando ku aktualmente tin un kantidat konsiderabel di kaso di grip den komunidat.
E vírùs di grip por kousa di keho físiko i tambe keintura, tosamentu, doló di garganta, doló di múskulo i kansansio. Pa hopi hende e kehonan aki ta pasa den un tempu kòrtiku, sinembargo gruponan vulnerabel manera hende grandi, mucha yòn, hende muhé na estado i personanan ku un kondishon króniko ta kore un riesgo mas haltu di haña komplikashon grave.
Bakunashon i medidanan di prevenshon pa protehá personanan mas vulnerabel, GGD ta rekomendá pa pasa tuma e angua (bakuna) serka nan dòkter di kas. E kampaña di bakunashon ta duna komunidat e protekshon nesesario pa baha e chèns di malesa grave òf hospitalisashon.
Pa yuda frena plamamentu di e vírùs, GGD ta hasi un yamada urgente na tur habitante pa apliká e medidanan di higiena básiko aki:
- Laba man regularmente ku awa i habon;
- Tosa i nister den èlebog pa evitá ku e vírùs ta plama den aire;
- Usa lensu di papel i benta nan afó mesora despues di usa nan;
- Keda kas ora bo ta malu i evitá kontakto direkto ku personanan vulnerabel;
- Sòru pa tin sufisiente ventilashon den tur espasionan paden.
Pa mas informashon tokante bakunashon i medidanan di protekshon, por bishitá e wèpsait ofisial di GGD Boneiru.
Kargando komentarionan...