Fundashon Akohida Profeshonal pa Mucha Boneiru (FAPM) a duna start na e asina yamá “Fiesta di Piramide”, un evento spesial ku tin komo meta pa pone enfoke riba e desaroyo di kuido i guia pa muchanan na Boneiru.

E selebrashon ta marka e momento ku vários lidernan di akohida a kuminsá ku un training intensivo den e método edukativo “Piramide method”. E método aki ta enfoká riba stimulashon di desaroyo integral di mucha, inkluyendo idioma, sosialisashon i kapasidat kognitivo. E metodo ta konsistí di un seri di les pa lidernan di akohida. E training ta dura un aña i mei. Despues, lo sigui ku otro grupo, te ora tur trahadó pedagogiko a haña e training pa por traha ku e sistema Piramide. E meta prinsipal ta pa halsa kalidat di kuido i sostené un bon desaroyo pa muchanan di 0 te 7 aña na Boneiru.

Segun FAPM, e inisiativa ta un paso importante pa mehorá kalidat di kuido i edukashon den e sektor di akohida. Ku e entrenamentu aki, lidernan lo haña mihó hèrmèntnan pa guia muchanan den nan promé añanan di bida, un etapa krusial pa nan desaroyo.

“Fiesta di Piramide” no solamente ta un momento di selebrashon, pero tambe un oportunidat pa kompartí konosementu i eksperensia entre profeshonalnan den e sektor. 

FAPM ta spera ku e proyekto lo kontribuí na un mihó futuro pa muchanan i pa alsa kalidat di akohida na Boneiru.

Advertisement