Den oranan di mardugá di djárason 23 di sèptèmber, Kuerpo Polisial Hulanda Karibense (KPCN) a tene un kòntròl di tráfiko dirigí riba uso di alkohòl riba Kaya Libertador Simon Bolivar.

Durante e kòntròl, polis a kontrolá 12 shofùr mediante un tèst di supla pa determiná si nan a konsumí mas alkohòl ku e límite permití pa lei pa un persona ku ta manehá un vehíkulo. Dos persona a keda detené pa sospecha di manehá bou di influensia di alkohòl i hiba pa warda di polis pa un análisis di rosea.

Advertisement

E promé sospechoso ta un dama di inisial J.L.v.K., di 34 aña. Su reibeweis a keda konfiská.

E otro sospechoso ta un hòmber di inisial A.C.V., di 56 aña. E análisis a mustra ku el a konsumí alkohòl, pero ku e nivel no tabata riba e límite permití pa lei pa manehá. Sinembargo, polis a determiná ku e tabata manehá sin un seguro bálido, pa kua el a haña un but.

KPCN ta bolbe hala atenshon di shofùrnan pa usa alkohòl responsabel ora ta partisipá den tráfiko. Manehá bou di influensia di alkohòl ta un delito i por pone shofùr, okupante i otro hende na peliger.

Segun KPCN, un persona ku ta manehá bou di influensia di alkohòl por haña un but, un prohibishon temporal pa manehá, konfiskashon di reibeweis, kastigu di prizòn òf un kombinashon di diferente kastigu. Severidat di e kastigu ta dependé di seriedat di e situashon.

KPCN ta rekordá ku kada shofùr den tráfiko ta responsabel no solamente pa su mes i okupantenan den e vehíkulo, pero tambe pa otro hende rondó di dje.