Djadumingu 11 di òktober 2026 ta kuminsá e 59 edishon di Regatta Bonaire. Durante di e evento, Tim Multidisiplinario Marítimo Hub Boneiru (MMHB), huntu ku su partnernan di kadena, lo hasi kòntròl marítimo pa supervisá kumplimentu di lei i regulashonnan vigente ku ta kontribuí na seguridat riba awa.

E partnernan di kadena ta Duana Hulanda Karibense, Koninklijke Marechaussee (KMar), Wardakosta di Karibe Hulandes, Kuerpo Polisial Hulanda Karibense (KPCN) i Entidat Públiko Boneiru (OLB). E instansianan lo sostené otro den ehekushon di nan tarea i manda refuerso èkstra pa posibel asistensia den kaso di emergensia. E kòntròl lo tuma lugá den e awanan entre Kòrsou i Boneiru, rondó di Boneiru i den e bahia di Kralendijk.

Advertisement

Duana Hulanda Karibense lo supervisá tráfiko di merkansia ku ta pasa frontera i kontrolá kumplimentu ku proseduranan di importashon i eksportashon i kontrolá pa merkansia prohibí. Koninklijke Marechaussee (KMar) ta responsabel pa vigilansia di frontera na Boneiru. E servisio lo kontrolá kondishonnan di entrada di persona i kontribuí na kombatimentu di kriminalidat.

Wardakosta di Karibe Hulandes lo kontrolá balides di dokumentonan di barku, inkluso karchi di registrashon i pèrmit pa nabegá. E dokumentonan mester ta bálido pa e área di Boneiru i Kòrsou. Tambe lo kontrolá si e kantidat di persona riba boto ta kuadra ku e kapasidat indiká den e karchi di inspekshon. Ademas, Wardakosta lo kontribuí na mantenementu di órden públiko i seguridat riba awa.

Kuerpo Polisial Hulanda Karibense (KPCN) lo ta responsabel pa mantenshon di órden públiko i seguridat, tantu riba laman komo den i rondó di e área di evenemento. E tareanan ta inkluí supervishon, seguridat di tráfiko i prevenshon di molèster. Den kaso di insidente òf emergensia, KPCN lo hasi e intervenshon polisial nesesario i koordiná asistensia ku otro servisionan di emergensia i partnernan marítimo.

Entidat Públiko Boneiru (OLB) – Servisio di Haf i Lots lo kontrolá uso korekto di bui i lugánan pa mara boto, asina tambe ankramentu. Bui ku ta mará sin outorisashon lo wordu retirá. Ta ilegal pa transportá persona sin e pèrmitnan nesesario. Huntu ku Wardakosta di Karibe Hulandes, OLB lo kontrolá pèrmitnan, registro i sertifikadonan nashonal di seguridat pa kontribuí na protekshon di bida riba laman.

MMHB ta pidi tur hende pa sali pa awa bon prepará i konsehá pa tuma kontakto ku e instansianan kompetente den kaso di pregunta. E organisashon ta deseá tur habitante di Boneiru i bishitante un Regatta dushi i seif.