Direktorado di Supervishon i Mantenshon di Lei (DT&H) a kuminsá for di 20 di yüli 2026 ku kontròlnan integral i riguroso riba establesimentunan ku ta bende produkto alimentisio na Boneiru.

E akshon ta forma parti di programa di ehekushon pa 2026 i ta basá riba análisis di riesgo i maneho di supervishon i mantenshon di lei di DT&H. Meta di e kontròlnan ta pa garantisá ku produkto alimentisio ta keda bendé den kondishonnan sigur i di bon kalidat pa konsumidónan.

Durante e inspekshonnan, DT&H ta evaluá diferente aspekto, entre otro kalidat i seguridat di produkto alimentisio, estado higiéniko di e establesimentu, kontròl di vèktor, aspektonan di medio ambiente i si e empresa ta disponé di pèrmitnan nesesario pa operá. Tambe ta kontrolá si produktonan ta kumpli ku eksigensianan di etikèt konforme Dekreto Etikèt di Produktonan Alimentisio BES.

Promé ku e proyekto a kuminsá, establesimentunan relevante a risibí informashon tokante meta di ko`ntròlnan, base legal di proseso i posibel medidanan ku por wòrdu tumá den kaso di no kumplimentu. Segun DT&H, tambe lo publiká video informativo pa duna mas klaridat tokante diferente tema relashoná ku seguridat alimentisio.

E kontròlnan lo kontinuá den diferente bario na Boneiru, unda inspektornan lo bishitá supermerkado, minimarket i otro negoshi ku ta bende kuminda i bibida.

Ku e inisiativa aki, DT&H ta indiká ku nan ta sigui trahá pa protehá salú públiko i fomentá kumplimentu di normanan vigente.

Advertisement