Kuerpo Polisial Hulanda Karibense (KPCN) a sertifiká resientemente ocho (8) agente nobo pa su ‘biketeam’, ampliando asina e kapasidat di e tim i garantisando ku tin sufisiente agente disponibel pa patrùyá riba baiskel.

E ‘biketeam’ ta un grupo di agente polisial ku a risibí entrenamentu spesial pa patruyá riba baiskel. Nan ta entrená pa aktua rápido, sigur i efektivo den situashonnan kaminda mobilidat i fleksibilidat ta esensial.

E ‘biketeam’ di KPCN ta eksistí for di 2009. Pa bira parti di e tim, agentenan mester sigui un entrenamentu intensivo bou di guia di instruktornan Suandy Clarenda i Yael Soliano. Durante e kurso, nan ta siña kon pa manehá nan baiskel di manera profeshonal i kon pa respondé adekuadamente na situashonnan di polis.

Un di e bentahanan mas grandi di ‘biketeam’ ta nan mobilidat. Agente riba baiskel por move mas rápido den áreanan okupá, pasa dor di hanchi smal i kayanan yená ku hende, kaminda outo tin limitashon.

Esaki ta hasi nan partikularmente útil durante evento grandi manera Karnaval, Dia di Rincon i Regatta, òf durante temporada di barku krusero. Ademas, e presensia di agente riba baiskel ta hasi nan mas visibel i mas fásil pa aserká. Esaki ta kontribuí na un mihó kontakto ku komunidat i un sentido di siguridat mas grandi riba kaya.

Advertisement