Energia TV a aserka KPCN tokante diskushon di prosedimentu pa buskeda di hóben Milton Frans. Riba nos pregunta i reakshon di komunidat tokante dikon a para e buskedá anochi nos a risibí e sigiuente reakshon.

Reakshon KPCN: "KPCN a tuma nota di preguntanan ku a surgi den komunidat relashoná ku e búskeda den bahia di Sorobon / Lac Cai.

Promé ku tur kos, nos pensamentu ta bai na famia i sernan kerí di e defuntu. Nos ta komprondé ku e pèrdida aki ta lanta emoshonnan profundo i ku tin pregunta tokante e manera ku a kondusí e búskeda.

Na momentu ku tin notifikashon di un persona pèrdí, ta ehekutá esaki segun e protokòl stipulá. Na e momentu ei ta wak direktamente na e informashon ku tin disponibel, e lokashon, e sirkunstansianan na e sitio, e posibel kondishon di e persona pèrdí, seguridat di e timnan ku ta drenta akshon i disponibilidat di medionan. A base di esaki, ta determiná kua akshon ta responsabel i efektivo na e momentu ei. Ta keda hasi e evaluashonnan aki kontinuamente durante un búskeda, debí ku e sirkunstansianan por kambia.

Djabièrnè atardi, alrededor di 3.15 or, ‘meldkamer’ sentral a risibí notifikashon tokante un persona ku for di mas o ménos 1 or di mèrdia tabata pèrdí den bahia di Sorobon / Lac Cai. Relashoná ku e notifikashon aki, mesora a start un akshon di búskeda. Den e búskeda aki tabatin entre otro KPCN, Koninklijke Marechaussee, STINAPA, Wardakosta Karibe Hulandes, Duana, Citro i boluntarionan enbolbí. Tambe a desplegá medionan riba laman i den laman.

Djabièrnè anochi, alrededor di 7.20 or, a para e búskeda temporalmente pa motibu ku a bira skur. Búskeda den e área di Sorobon / Lac Cai, den oranan di anochi ta trese rísiko di seguridat adishonal kuné i e efektividat di e akshon ta baha pa motibu di bista i orientashon limitá. Banda di esaki, e laman a kuminsá bira mas brutu. Na e momentu ei a informá famia di e persona pèrdí ku ta para e búskeda temporalmente i e motibu di esaki.

E intenshon tabata pa reanudá e búskeda e siguiente mainta. Promé ku por a kuminsá ku e akshon aki, ‘meldkamer’ sentral a risibí notifikashon ku a topa ku un kurpa den bahia di Sorobon / Lac Cai. E servisionan enbolbí a bai mesora na e sitio. Seguidamente a determiná ku ta trata di e persona ku tabata pèrdí.

Nos ta komprondé ku tin pregunta tokante e momentu ku a interumpí i reanudá e búskeda. Ta importante ku por hasi e preguntanan aki. Na mes momentu, nos ta pidi komunidat pa ta kouteloso ku suposishon i spekulashon. E servisionan di emergensia enbolbí a aktua a base di e informashon ku tabata disponibel na e momentu ei i ku akshon di e medionan ku tabata responsabel pa usa na e momentu ei.

Meskos den kaso di tur insidente, lo evaluá e akshon aki tambe. E ora ei lo evaluá e akshon, e kolaborashon entre e servisionan enbolbí i e komunikashon ku komunidat.

Nos ta gradisí tur organisashon, boluntario i siudadano ku a yuda durante e búskeda i un biaha mas nos ta ekspresá nos profundo kondolensia na famia i sernan kerí di e defuntu".

Advertisement