President di sindikato AFBW i representante di USIBO, Cherel Kwidama, a ekspresá su profundo preokupashon pa e krísis gubernamental ku aktualmente ta afektando pueblo Boneriano. Kwidama a kualifiká e situashon aktual komo e pió gobernashon ku e isla a yega di konosé.

Añanan di instabilidat i pleitamentu pa motibu di plaka a hiba na un káos total den maneho di nos isla. E instabilidat polítiko aki ta kousando un impakto direkto i negativo riba komunidat i riba trahadónan ku ta sufri konsekuensianan di falta di vishon i stabilidat.

Segun Kwidama, e krísis aki ta pone e motor ekonómiko di Boneiru na riesgo. Turismo, ku ta e pilá prinsipal di nos isla i ku ta representá 50% di tur entrada i empleo, ta keda seriamente menasá. Kwidama a boga pa gobernantenan sinta huntu ku urgensia pa buska solushon i aliviá e preshon ku pueblo ta sintiendo, spesialmente ku e oumento di 30% riba tarifa di koriente. Kwidama tambe a indika ku si e situashon aki kontinuá, e klase medio na Boneiru lo disparsé, oumentando nivel di pobresa i dividiendo sosiedat den solamente dos klase sosial.

For di plataforma di USIBO, Kwidama a mustra su preokupashon ku e lucha pa mehorá status di pueblo ta parse di ta sin resultadonan sperá. El a denunsiá e falta di kòntròl efektivo riba preisnan di produktodi promé nesesidat i subidá kontinuo di preis di gasolin.

Sindikato AFBW i USIBO ta eksigí pa e gobernantenan bini ku proyektonan i solushonnan konkreto ku realmente ta benefisiá pueblo i aliviá e karga ekonómiko ku ta pisa siudadanonan Boneriano.

Advertisement