Sektor agrario i kultivo na Boneiru ta pasando den un situashon sumamente krítiko i preokupante pa motibu di fenómeno klimátiko ku ta konosí komo 'Super El Niño'. E sekura severo i falta di yobida a laga hopi tereno i kunuku sin kuminda pa bestia i hungando un ròl devastador den bida di agrikultornan.

Reginald Dortalina, mihó konosí komo "Yonchi", a trese e problema agudo aki dilanti. Segun Dortalina, e situashon a bira asina urgente ku e kunukeronan mes no por solushoná esaki nan so. A ser aklará ku Water en Energiebedrijf Bonaire (WEB) no ta responsabel pa hiba awa direktamente na e kunukunan pa agrikultura, kual ta hasi e nesesidat pa intervenshon di gobièrnu sumamente nesesario.

Buskando un solushon pa e krísis aki, Yonchi Dortalina a tene kòmbersashon ku Diputado Dennis Martinus. Den e reunion aki, e diputado a splika ku mester inisiá un proseso pa por risibí e ayudo rekerí i pa establesé struktura pa por yega na e awa ku ta nesesario.

Esaki ta konsiderá komo e promé stap fundamental pa salba e bida di e bestia den e kunukunan, aliviá e preshon ekonómiko i emoshonal riba kunukeronan i tambe garantisá futuro i kontinuidat agrario di Boneiru.

Dortalina ta pidi gobièrnu pa aktua ku rapides pa asina evitá mas pèrdida den e sektor agríkola na Boneiru.

Advertisement