Punta Blanku Farms a bira viktima di kaso di ladronisia di webu. Segun propietario Nadine Emerenciana, malechornan a bai ku aproksimadamente 240 dozein di webu, ku tin un balor di mas o ménos 1.300 dòler.

Nadine a ekspresá ku e ta hopi desapuntá pa loke a sosodé. El a bisa ku ta hopi trabou duru i esfuerso ta bai den produkshon di e webunan ku despues ta yega na supermerkado. Segun Nadine, Punta Blanku nunka tabata enfrentá ku problema di ladronisia den pasado, i ta totalmente deskonosí di unda e situashon aki a kuminsá. E propietario a hasi un yamada na komunidat pa por fabor stòp ku hortamentu na nan lokalidat. Mientras tantu, e negoshi a tuma diferente medida di seguridat i tin kamera di vigilansia. Segun Nadine, tin imagen di kamera disponibel i nan ta kla pa koperá ku hustisia si esaki ta nesesario. Un keho di ladronisia a keda entregá na warda di polis.

Segun informashon di polis, riba djabièrnè 1 di mei a drenta keho di ladronisia di webu for di un kompania na altura di Punta Blanku. Deskonosínan a haña akseso na e tereno i a bai ku 8 kaha grandi ku tabata kontené 12 palèt, ku kada un ku 30 webu.

Promé ku esaki, riba djabièrnè 24 di aprel, tambe a drenta keho di ladronisia na e mesun kompania. Na e okashon ei, deskonosínan a horta 120 kaha di webu, ku kada kaha ku 12 webu. Polis ta sigui investigando ambos kaso.

Negoshi di famia ku mas di 70 aña

Punta Blanku Farm ta un negoshi di famia ku pa mas di 70 aña ta produsí webu na Boneiru. Ku mas o ménos 40.000 galiña, e kompania ta produsí un kantidat grandi di webu diariamente pa merkado lokal.

Advertisement