LVV ta implementá plan di seguridat pa kombatí hòrtamentu riba nan tereno

Orden Públiko i Seguridat

LVV ta implementá plan di seguridat pa kombatí hòrtamentu riba nan tereno

Pa LJ 24 Jun, 2026 5 Min Lesa 23 Bishitante

Direktor departamento di Agrikultura, Krio di Bestia i Peska (LVV), Maurice Adriaens, a anunsiá un plan di seguridat nobo ku e meta pa frena i kombatí problemátika di hòrtamentu ku ta tumando lugá riba nan tereno.

Adriaens a ekspresá su lamento profundo relashoná ku e kasonan resien di ladronisia, enfokando riba e echo ku esaki ta mas doloroso ainda debí na e gran variedat di fruta ku aktualmente tin den e kuránan di plantashon na LVV. E ladronisia nan aki no solamente ta kousa pèrdida finansiero, sino tambe ta perhudiká esfuerso i dedikashon diario pa oumentá produkshon lokal riba nos isla.

Pa duna un kontesta inmediato na e situashon preokupante aki, LVV a inisiá kaba ku e promé trabounan, outorisando instalashon di kurá di yatu rònt di e tereno i áreanan di plantashon. E tipo di kura aki ta sirbi komo un promé barera pa stroba entrada di personanan deskonosí na e sitionan di kultivá.

Banda di e bareranan aki, Adriaens a duna di konosé ku e plan ta inkluí inovashon teknológiko. Pronto lo outorisá i instalá un sistema moderno di seguridat digital ku lo ta ekipá ku kámaranan di vigilansia avansá. E kámaranan aki lo pèrkurá pa un alertá i monitoriá kontinuo, asina garantisando un mihó protekshon pa e plantashon i frena ladronisia.