Marivié Anthony, representando un grupo di mayor preokupá, a trese dilanti varios pregunta i preokupashon tokante proseso di subsidio pa artikulonan di skol i e organisashon di transporte eskolar na Boneiru. Segun Anthony, e situashon aktual a generá inseguridat i frustrashon serka diferente famia, spesialmente awor ku aña eskolar ta punto di kuminsá.

Durante último simannan, hopi mayor a serka Anthony ku pregunta tokante nan petishonnan pa yudansa eskolar. Segun e grupo, tin mayornan ku a entregá nan dokumentonan ya algun tempu, pero te awor ainda no a risibí un kontesta kla tokante si nan petishon a keda aprobá, ningá of si e ta ainda den proseso.

Advertisement

“Djaluna skol ta habri atrobe, pero ainda tin mayornan ku no sa si nan petishon a wordu aprobá òf no,” Anthony a indiká. E grupo ta pidi mas klaridat tokante e proseduranan i e tempu ku e proseso normalmente ta tuma.

Preokupashon tokante dokumentonan personal

Un di e puntonan ku a kousa mas reakshon ta e rekisito pa presenta un estado di kuenta di banko komo parti di e aplikashon.

Segun Anthony, hopi mayor ta puntra pakiko e tipo di informashon privá aki ta nesesario si e evaluashon ya ta basá riba entrada finansiero. E grupo no ta kontra kòntròl òf verifikashon di informashon, pero ta pidi mas transparensia tokante pakiko e dokumentonan ta wordu pidi, kon nan ta wordu usa, ken tin akseso na nan i kon e privasidat di aplikantenan ta wordu protehá.

Duda tokante spaar-geld

Anthony a trese dilanti preokupashonnan di mayornan ku ta bisa ku nan petishon por wordu afektá pasobra nan tin spaar-geld.

Segun e grupo, un famia por ta spaar pa diferente meta, manera kumpra un kas, un outo, kubri gastunan inesperá of invertí den futuro di nan yunan. Nan ta argumentá ku e hecho ku un famia tin algun reserva finansiero no nesesariamente ta nifiká ku e no tin nesesidat di sosten pa gastunan relashoná ku skol. P’esei nan ta pidi ku e kriterionan pa evaluá petishonnan wordu publiká di manera kla, inkluyendo eventual límite of kondishonnan relashoná ku spaar-geld.

Kambionan den transporte eskolar

Otro tema importante ta e kambionan den diferente ruta di transporte eskolar. Segun grupo di mayornan, tin muchanan ku a wordu reasigná na otro bus of otro ruta ku no ta sigui e mesun trayekto ku anteriormente. Esaki, segun nan, ta krea reto pa famianan ku mester koordiná trabou, kuido di otro yunan i otro responsabilidatnan diario.

E grupo ta pidi mas informashon tokante e kriterionan ku ta wordu usa pa asigná muchanan na rutanan i si mayornan tin oportunidat pa pidi pa revisá ora un kambio ta krea problema den nan situashon familiar.

Yamada pa mas komunikashon i transparensia

Den su deklarashon, Anthony a enfatisá ku e inisiativa no ta dirigi kontra ningun persona, departamentu of partido polítiko. “Mi no ta lanta pa hasi problema. Mi ta lanta pa trese klaridat i pa yuda mayornan ku no semper ta sinti nan mes komfortabel pa papia,” el a bisa.

E grupo ta pidi pa Gobièrnu di Boneiru fortifiká e komunikashon ku mayornan durante e proseso di aplikashon. Entre e sugerensianan tin notifikashonnan regular tokante e estatus di petishonnan, splikashonnan kla ora un petishon ta wordu ningá, i mas informashon tokante eventual retrasonan.

“Bienestar di e mucha mester keda promé”

Na final, e grupo di mayornan ta pidi:

• Klaridat den kriterionan pa kalifiká pa subsidio;
• Mas transparensia den e proseso di evaluashon;
• Respet pa privasidat di aplikantenan;
• Trato igual pa tur famia;
• Komunikashon oportuno tokante kambio den transporte eskolar;
• Un prosedura kla pa pidi revisá di un desishon.

Segun Anthony, e meta prinsipal no ta kritiká, sino yega na mehorashon den e sistema. “Nos no mester keda ku pregunta solamente. Nos mester yega na klaridat. For di klaridat nos por yega na kambio, i for di kambio nos por yega na solushon,” el a konkluí.

E grupo ta spera ku lo kontribuí na un dialogo konstruktivo ku eventualmente lo resultá den un proseso mas transparente i aksesibel pa tur mayor na Boneiru.