E idea pa lansa un movementu polítiko nobo bou di e nòmber “Bonaire Respetá” lo no keda realisá pa awor akí maske meta prinsipal di e partido lo tabata pa buska mas outonomia pa Boneiru. Segun analista i abogado Michiel Bijkerk e momento no ta adekuá.

Segun Bijkerk, e plan tin akohidá i a risibí reakshonnan serio di personanan den komunidat, pero e realidat di e panorama internashonal ta pone un peso grandi riba e desishon aki.

Bijkerk a splika ku e situashon mundial aktual ta demasiado insigur pa enfoká riba kambionan polítiko grandi na e momento aki. Den su análisis, el a menshoná varios faktor krítiko manera:

• Konfliktonan Mundial: Preshon riba OTAN i gueranan ku ta tumando lugá ta krea un ambiente di riesgo haltu;
• Seguridat Alimentisio: Bijkerk ta sugerí ku Boneiru mester enfoká mas bien riba preparashon propio, manera mantenshon di posnan di awa i stòk di kuminda, en bes di kambio di outonomia den e krísis aki;
• Sosten di Reino: Na e momento aki, e ta mira balor den keda huntu i mustra solidaridat ku Reino Hulandes miéntras e olanan di instabilidat mundial ta pasa.

E partido, ku tabatin komo meta pa hiba Boneiru na un referèndùm pa mas outonomia, no ta keda kitá for di mesa pa semper, sino simplemente pone un banda miéntras e situashon geopolítiko ta restablesé.

Bijkerk a finalisá bisando ku nos mester relahá, pero keda atento. Segun e analista, Boneiru semper ta afortuná ora tempu di peliger aserká.

Advertisement