Direktorado di Supervishon i Mantenshon di Lei di Entidat Públiko Boneiru (OLB) ta kontinuá ku su esfuersonan pa mehorá siguridat i kalidat di bida riba nos isla, miéntras e ta intensifiká kolaborashon ku e otro islanan BES. Entre otro, e inisiativa pa limpiesa di kaminda i inspekshonnan konhunto na Sint Eustatius.

E proyekto “Rem op” di Entidat Públiko Boneiru ta un inisiativa ku ta enfoká riba retirá piedra, matanan i otro opstákulo for di via públiko. E meta prinsipal di e kampaña aki ta pa mehorá siguridat di tráfiko i garantisá un paso liber i sigur pa tantu peaton ku vehíkulonan den komunidat.

Advertisement

Sherman Blanken, Hefe di Toezicht & Handhaving, a informá ku e trabounan aktualmente ta den un pousa temporal. E ekipo, mashin i vehíkulonan ku ta wòrdu usá pa e proyekto aki ta for di servisio pa motibu di mantenshon planifiká. Mesora ku e trabounan di mantenshon kaba, lo reanudá e kampaña di limpiesa riba rutanan klave.

Durante e bishita aki, e inspektornan di Boneiru a traha huntu ku nan koleganan di Sint Eustatius pa ehekutá varios inspekshon. Pa promé biaha, e ekipo di Boneiru a kontrolá supermarketnan, pòmpnan di gasolin i sitionan di karga. E inspekshonnan a enfoká riba:

• Siguridat di kuminda den establesimentunan di kompra i benta;
• Kòntròl di midimentu i pèrmitnan nesesario;
• Kumplimentu general ku regla i leinan lokal.

  

  Segun Sr. Blanken, e interkambio di ekspertisio i konosementu aki ta vital pa fortalesé trabou di mantenshon di lei riba tur dos isla. Trahando ku e mesun sistema i standartnan ta permití mas kòntròl spesífiko, mihó sosten na empresarionan lokal, i un mehorashon general di kalidat di supervishon den Karibe Hulandes.