NAPA Boneiru a selebrá 40 aniversario riba 1 di ougùstùs 2026 ku un anochi di rekonosementu, gratitut i sosten na komunidat. Durante e evento, e kompania a anunsiá un seri di donashon i kompromiso sosial ku, huntu ku aporte adishonal di partneri invitado, a resultá den un kontribushon total di $19.672 na benefisio di diferente organisashon lokal.

NAPA a kuminsá operá na Boneiru na 1986 den un edifisio hopi mas chikí ku su lokalidat aktual. A medida ku e negoshi a sigui krese, e operashonnan a muda pa e edifisio unda e kompania ta enkontrá awe. Segun Direktor Gerente Andre Lendering, e negoshi a kuminsá den solamente un skina chikí di e edifisio aktual, ku no tabata ni un oktavo di e espasio ku e kompania ta usa aworaki.

Durante diskurso durante selabrashon di 40 aña, Direktor Gerente Andre Lendering a pone enfoke riba responsabilidat sosial di empresanan ku ta hasi negoshi na Boneiru. Entre e donashonnan anunsiá tabatin sosten kontinuo na Fundashon Kuido Persona Disabilta, balorá na $3.200, i un kompromiso pa kubri gastunan di kuminda i bebida durante biahe anual di un grupo di muchanan di ménos rekurso ku ta bishitá Washington Slagbaai.

Fundashon Alzheimer Boneiru i Kas Flamboyan a risibí un donashon di $2.000 kada un, mientras ku Ambulance di Deseo a haña sosten den forma di kombustibel gratis pa un aña, ku un balor máximo di $1.200.

Durante e selebrashon, Direktor Gerente Andre Lendering tambe a kompartí algun reflekshon riba futuro di e empresa familiar. El a indiká ku su yu muhé ta gradualmente inbolukrá den e negoshi i ta preparándo pa eventualmente sigui ku e legado di NAPA Boneiru. Sinembargo, Lendering a laga kla ku, pa awor, el no tin intenshon di retirá ni di laga su funshon. El a indiká ku e gusta e trabou i no tin intenshon di sinta ketu.

Ku e donashon i inisiativanan aki, NAPA Boneiru a marka su 40 aniversario no solamente ku un selebrashon di su historia empresarial, sino tambe ku un kontribushon supstansial na organisashonnan ku ta traha pa bienestar di komunidat boneriano.

Advertisement