Papiamentu
Pelíkula "Lanta’riba" a tene un estreno eksitoso na Caribbean Cinemas Sambil, Kòrsou, kaminda e sala di sine a yena kompletamente durante promé presentashon di e produkshon.
E momento ta marka un logro importante pa e pelíkula i su tim kreativo, i ta mustra e interes di públiko pa produkshonnan sinematográfiko lokal ku ta pone kultura i historia di nos region na sentro di atenshon. "Lanta’riba" ta un pelíkula skirbí i dirigí pa Sendion Balentin. E aktornan Mayjeanrick Marceli, Amos Balentin i Mama Elia Isenia ta forma parti di e elenko prinsipal.
E produkshon ta realisá pa Mangazina di Rei i Balentin Creations, ku sosten di Het Cultuurfonds Caribisch Gebied, Komité di Konmemorashon di Pasado di Sklabitut i Openbaar Lichaam Bonaire (OLB).
E estreno eksitoso ta representá un paso importante pa e produkshon i pa e desaroyo di sine lokal na nos islanan. Ademas, e sala yen ta reflehá e interes i apresio di públiko pa nos propio produkshonnan sinematográfiko, talento kreativo i kultura.
Ku "Lanta’riba", e ekipo kreativo ta kontribuí na e promoshon di nos historia i identidat kultural atrrabes di e arte sinematográfiko.
Kargando komentarionan...