Movementu 21 (M21) a selebrá su di 5 Kongreso riba djabièrnè 30 di òktober 2026, kaminda e partido a tuma diferente desishon tokante su struktura organisatorio i liderasgo pa e siguiente añanan.

Un di e desishonnan prinsipal tabata nombramentu di Anthony (Tony) Weber komo líder nobo di M21. E ta susedé Daisy Coffie, kende awor ta asumí e funshon di presidente di direktiva di e partido.

Advertisement

Durante e kongreso tambe a nombra miembronan nobo pa Komishon di Kaha i a ratifiká e Kódigo di Étika i Komportamentu Interno di M21.

Ademas, e partido a ratifiká su Plan di Maneho 2026–2028, ku ta establesé e prioridat i akshonnan pa e próksimo tres añanan.

Informashon tokante Anthony Weber

Durante e kongreso, e miembronan a risibí informashon tokante diferente punto relashoná ku Weber. Segun e komunikado di M21, Ministerio Públiko a disidí di no hasi investigashon den un kaso di keho kontra dje.

M21 tambe a informá ku Weber a risibí su Verklaring Omtrent het Gedrag (VOG) na òktober 2026, i ku el a wordu nombrá komo miembro ekstraordinario di diferente komishon fiho di Konseho Insular: B&O, R&O, T&H i S&Z. Segun e komunikado, e nombramentu aki a drenta na vigor riba 27 di òktober 2026.

Fase nobo pa M21

Ku e di 5 Kongreso, M21 ta marka su sinku aña di eksistensia i e inisio di un siguiente fase pa e organisashon.

Segun e partido, e desishonnan tumá durante e kongreso ta forma parti di su plan pa fortalesé su struktura interno, definí responsabilidatnan i sigui ku e planifikashon pa e próksimo añanan.

M21 a gradisí su miembronan i sostenedónan pa nan partisipashon durante e sinku añanan di eksistensia di e partido.