Durante oranan di anochi di djabièrnè 25 di sèptèmber, alrededor di 9:50 or, polis a mira un quad/raptor riba Kaminda Tras di Montaña. Segun polis, tabatin motibu pa kontrolá e orígen di e vehíkulo i a duna e shofùr señal pa para. E shofùr no a kumpli ku e òrdu di polis, a hisa velosidat i a sigui kore den direkshon di Playa. Esaki a resultá den un persekushon.

Riba altura di Kaya Caribe i Kaya Amsterdam, e shofùr a subi un tereno den un intento pa hui. E patruya a sigui e quad/raptor for di un distansia i despues a logra blòki’é riba Kaya Caribe. Durante e akshon, e quad/raptor a dal den e vehíkulo polisial.

Advertisement

E shofùr, un hòmber di inisial J.J.B.B. di 18 aña, a keda detené pa no kumpli ku un òrdu di polis. E quad/raptor a wòrdu konfiská.

Despues ku e sospechoso a wòrdu transportá pa warda di polis, un grupo di personanan a presentá den konekshon ku e detenshon. Segun polis, durante e insidente a insultá i menasá agentenan i stroba trabou di polis. Un hòmber di inisial Q.A.M.W., di 38 aña, a keda detené pa no kumpli ku òrdu di polis, menasá un ámtenar den funshon i pa resistí detenshon.

Durante e detenshon di e sospechoso, polis a hasi uso di forsa i 'pepperspray'. E hòmber a resultá heridá i a pidi asistensia di ambulans pa dun’é tratamentu médiko.

Polis ta sigui ku e investigashon den e kaso.