Piskabon a organisá tayer pa piskadó i merkadera

Lokal

Piskabon a organisá tayer pa piskadó i merkadera

Pa AC 26 Sep, 2026 5 Min Lesa 4 Bishitante

Kooperativa di Piskabon a kuminsá riba 22 di sèptèmber ku un tayer di seis dia dirigí pa piskadó, merkadera i miembro di kooperativanan na Boneiru. E programa ta repartí den dos siman, ku tres dia di tayer pa siman i tres ora di durashon pa seshon.

Durante e promé seshon, dosente Raymond Gericho i Rudney Monte a duna informashon tokante prinsipionan di kooperativismo, i derecho i debernan di miembro di un kooperativa.

Segun Piskabon, e tayer ta enfoká riba konosementu i kapasidat nesesario pa piskadó i merkadera, asina tambe riba e manera kon kooperativanan por traha i organisá nan mes.

Diferente organisashon i instansia tabata invita pa kontribuí na e programa, inkluyendo Stinapa, Toezicht en Handhaving, Veterinaire Dienst, LVV, RDI i Rode Kruis. Durante un di e seshonnan, Bonaire Platinum tabata presente, ku Sherwin Pourier i Egbert Janga komo representante.

Piskabon a indiká ku e intenshon ta pa sigui eksplorá posibilidatnan pa kooperativanan na Boneiru traha huntu riba un plataforma kolektivo.

E organisashon a organisá un tayer similar aña pasá. E programa aktual a keda realisá den kuadro di e kolaborashon entre Gobièrnu di Boneiru i Piskabon pa informashon, preparashon i edukashon di miembro-nan.