Durante e wikènt ku a pasa, di djabièrnè 17 te ku djaluna 20 di aprel 2026, polis a registrá varios insidente relashoná ku uso di alkohòl i violashon di lei.

Detenshon pa manehá bou di influensia di alkohòl
Polis a detené dos shofùr pa manehá bou di influensia di alkohòl.

Djadumingu 19 di aprel, alrededor di 8:00 p.m., un hòmber di 40 aña (inisial J.G.P.M.) a keda detené na Kaya Patachi despues ku el a keda enbolbí den un aksidente tipo ‘hit and run’. E otro partido a logra detene’é. Durante e prosedura di “botsen is blazen”, e tèst di supla a mustra ku el a konsumí mas alkohòl ku ta permití pa lei. Ademas, e no tabata tin un reibeweis ni seguro bálido. El a haña un but.

Djabièrnè 17 di aprel, alrededor di 6:00 p.m., polis a detené un otro hòmber di 23 aña (inisial M.D.L.S.) na Kaya Korona, despues di un aksidente ku solamente daño material. Tambe den e kaso aki, e tèst di supla a indiká uso eksesivo di alkohòl. E sospechoso a haña un prohibishon di manehá pa dos ora. Ambos sospechoso a keda transportá pa warda di polis pa proseso adishonal i a risibí un prosès verbal.

Detenshon pa buracheria públiko
Djadumingu 19 di aprel, alrededor di 5:00 p.m., polis a detené un hòmber di 64 aña (inisial C.R.P.V.) na Kaya Filomena. E hòmber tabata durmi den su vehíkulo, opstakulisando tráfiko. Ora polis a intervenshoná, nan a nota un holó fuerte di alkohòl. E sospechoso no tabata kooperá ku òrdu di polis i a bira agresivo. Pa esaki, el a keda detené i hibá pa warda di polis.

Violashon di orario di sera
Den oranan di mardugá di djasabra 19 di aprel, alrededor di 3:45 a.m., polis a intervení na un lokalidat di hóreka na Kaya Libertador Simón Bolívar pa violashon di e orario di sera. Durante kontrol, tabatin un grupo di mas o ménos 10 persona presente. Polis a sera e negoshi mesora, i e doño a haña un prosès verbal pa violashon di Lei di Bebida i Hòreka BES. Polis ta sigui enfatisá riba importansia di responsabelidat den tráfiko i respetá lei i regulashonnan vigente.

Notifikashon di fivermentu

Den oranan di atardi di djasabra 18 di aprel 2026, polis a risibí un notifikashon tokante posibel fivermentu i pustamentu ilegal na altura di Kaminda Yato Bako i entrada di Amboina. Segun e informashon, e partisipantenan tambe tabata opstakulisá tráfiko. Na yegada di polis, a keda konstatá ku tabatin un grupo di persona presente, hunto ku diferente skuter i ‘fatbike’. Sin embargo, no a haña evidensia di fivermentu òf kareda ilegal na e momento. Ora polis a yega, tur e persona presente a bai for di e sitio.

Polis ta enfatisá ku kareda ilegal riba karetera públiko i fivermentu ta representá rísikonan serio pa seguridat, no solamente pa e partisipantenan mes, sino tambe pa otro usuarionan di tráfiko i personanan ku ta para wak. Si bo ta nota un situashon peligroso òf preparashon pa karedanan ilegal, polis ta pidi pa bo notifiká esaki mesora na meldkamer sentral via 911.

Advertisement