Polis a tene un kòntròl di tráfiko dirigí riba trùknan na Kaminda Lac djamars 17 di novèmber. Durante e kòntròl, sinku trùk a wordu inspekshoná, sin ku polis a konstatá ningun infrakshon.
Durante e kòntròl, polis a pone atenshon spesial riba velosidat, reibeweis, seguro i karga, inkluso transporte di santu i posibel sobrekarga. Ademas di e sinku trùk, polis a kontrolá tres outo partikular. Un di e shofùrnan a risibí un atvertensia pasobra e no por a mustra un seguro bálido.
Polis a kombersá ku e shofùrnan di trùk i a pidi nan pa tene kuenta ku habitantenan di e bario, pa asina limitá molèster ku trafikashon di trùknan.
Kòntròl di velosidat na Kaya Randolph Statius Van Eps
Riba e mesun dia, polis a tene tambe un kòntròl di velosidat na Kaya Randolph Statius Van Eps. Durante e kòntròl, a para un outo i e shofùr a risibí un atvertensia pa su manera di manehá demasiado duru.
Ku e kòntròlnan aki, polis ta sigui pone atenshon riba seguridat di tráfiko i kumplimentu di reglamentonan di tráfiko.
Kargando komentarionan...