Gezaghèber John Soliano a hasi un yamada urgente na miembronan di Konseho Insular pa yega na un solushon pa inestabilidat polítiko ku Boneiru ta eksperensiando. Den un karta na konsehalnan, Soliano a ekspresá su preokupashon no solamente tokante e turbulensia polítiko, sino tambe tokante señalnan di posibel interferensia polítiko den e aparato públiko.

Segun gezaghèber, e kambionan den e komposishon di koalishon i Bestuurscollege durante e último aña a pone kontinuidat di gobièrnu bou di preshon. E situashon a bira mas kompliká despues ku UPB a retirá su konfiansa den e kolaborashon ku MPB den un karta fecha 30 di yüli.

Ounke ainda no ta kla kiko e konsekuensianan lo ta pa e komposishon di Bestuurscollege, Soliano ta atvertí ku e inestabilidat polítiko por afektá seriamente kalidat i kontinuidat di gobernashon diario. El a señalá ku Boneiru ta mei mei di varios dosier importante, inkluyendo asuntonan sosial urgente, akuerdonan ku Hulanda i preparashon di presupuesto pa 2027.

Ademas, gezaghèber a revelá ku el a risibí señalnan tokante posibel interferensia polítiko den aparato di amtenar. Segun Soliano, kada órgano di gobièrnu tin su propio tarea i responsabilidat den e sistema dualista di gobernashon.

“Ta tarea di Konseho Insular pa pone kuadro i kontrolá Kolegio Ehekutivo, mientras ku gobernashon diario ta responsabilidat di Kolegio Ehekutivo,” Soliano a indiká. Segun e, ora e responsabilidatnan akí ta mesklá, esaki por debilitá proseso di toma di desishon i konfiansa di pueblo den gobièrnu.

Gezaghèber a enfatisá ku interferensia polítiko den ehekushon di gobièrnu òf den e aparato amtenar no ta deseabel i no ta bai di akuerdo ku e prinsipionan di bon gobernashon. P’esei el a hasi un yamada na partidonan polítiko pa respetá ròlnan institushonal i traha huntu pa restourá stabilidat.

Debí na seriedat di e situashon, Soliano a invitá e lidernan di frakshon pa un reunion spesial. Su meta ta pa logra un solushon ku por garantisá stabilidat i kontinuidat di gobièrnu te na e próksimo elekshon.

Advertisement