For di djabièrnè 5 di yüni, automobilistanan na Boneiru lo mester paga mas pa nan kombustibel. E tarifanan nobo lo wòrdu publiká dia 3 di yüni, pero segun informashon di Entidat Públiko Boneiru, un subida di preis ta inevitabel.

E oumentu ta resultado di desaroyonan riba merkado internashonal di petroli. Durante e último simannan, preis mundial di krudo a subi debí na tenshonan internashonal, loke a resultá den kostonan di kompra mas haltu pa kombustibel ku ta yega Boneiru.

Tur luna, e preis di kombustibel na Boneiru ta wòrdu determiná basá riba diferente faktornan, manera e preis internashonal di kompra, gastunan di transporte, almasenamentu, distribushon, akseins i ABB. Kambio den un òf mas di e elementonan aki tin influensia direkto riba e preis na pòmp.

E subida ku ta biniendo ta sperá pa afektá tantu automobilistanan partikular komo empresanan ku ta dependé di transporte pa nan trabou diario. Spesialmente preis di gasolin i disel ta eksperensiando preshon pa subi.

Diputado Mohamedjoenoes a indiká ku e gobièrnu lokal ta sigui e desaroyonan ku atenshon. Segun dje, ta eksistí kontakto ku e ministerio responsabel na Hulanda pa evaluá posibel medidanan ku por yuda redusí e impakto riba komunidat.

Entidat Públiko Boneiru ta hasi un yamada na habitantenan i empresanan pa tene kuenta ku e kambio den preisnan ku lo drenta na vigor dia 5 di yüni.

Advertisement