Promé Minister Rob Jetten a haña un reakshon alérgiko awe mainta despues ku algo a piki’é durante ku e tabata landa promé ku kuminsá su programa na Boneiru. Despues di un bishita na hospital, a wordu desidí pa adaptá parti di su programa na Boneiru i Aruba.

Debí na e situashon, Jetten no a por asistí na un desayuno plania ku Bestuurscollege di Boneiru. Tambe a anulá su bishita na departamento di Agrikultura, Krio di Bestia i Peska (LVV). Na LVV, Greenpeace tabatin plan pa protesta, pasobra gobièrnu Hulandes a bai den apelashon kontra e desishon di hues ku ta indiká ku Hulanda mester hasi mas pa protehá Boneiru kontra kambio klimátiko.

E siguiente actividatnan tabata riba programa na Boneiru:

• 10:00 or di mainta – Bishita na Selibon Lagun
• 10:45 or di mainta – Bishita na LVV (anulá)
• 11:30 or di mainta – Bishita na Kolegio San Bernardo
• 1:15 or di atardi – Bishita na proyekto di bibienda sosial tras di Bamboo Boneiru na Hato
• 2:15 te 2:45 or di atardi – Rueda di prensa pa finalisá e programa

Tambe na Aruba, kaminda e promé minister lo bai despues di Boneiru, varios sita i aktividatnan a wordu mové òf adaptá.

Rob Jetten ta bishitando St. Maarten, Saba, St. Eustatius, Boneiru, Aruba i Kòrsou for di 8 te 14 di mei 2026. Esaki ta su promé bishita na e partidonan Karibense di Reino den su funshon komo promé minister.

Advertisement