Programa Desaroyo di Talento Hulanda Karibense (TOP CN) a anunsiá ku entrante djárason 22 di aprel, profeshonalnan resientemente graduá por solisitá pa e trayekto di traha i treinen pa e periodo 2026-2027. E programa aki tin un durashon di un aña i ta enfoká riba fortifiká e kapasidat profeshonal na Boneiru, Sint Eustatius i Saba.

E meta di TOP CN ta pa brinda hóbennan ku rais karibense e oportunidat pa drenta den servisio di instansianan di gobièrnu, manera Entidat Públiko òf Rijksdienst Caribisch Nederland (RCN), miéntras nan ta sigui un programa di training intensivo.

E trayekto ta designá pa hiba e partisipante riba un kaminda di desaroyo tantu personal komo profeshonal:

• Fecha di inisio: E stazjèrnan ta kuminsá traha dia promé di ougùstùs 2026.
• Kuríkulo: E programa di training mes ta ranka sali dia 14 di sèptèmber i ta dura 10 luna.
• Formashon: Partisipantenan lo risibí guia profeshonal i tayer den áreanan manera maneho stratégiko, abilidatnan di maneho (management skills) i lingwístika.

TOP Caribisch Nederland ta dirigí spesífikamente riba un grupo selektá di kandidato:

1. Profeshonalnan hóben ku rais karibense.
2. Graduadonan resiente di nivel HBO òf WO.
3. Hende ku tin e motivashon pa regresá Boneiru, Sint Eustatius òf Saba den un término di máksimo 3 aña despues di a kaba nan estudio.

E programa aki ta un manera pa fortifiká e merkado laboral lokal i krea oportunidatnan kaminda young professionals por krese i bira lidernan di mañan.

Advertisement