Openbaar Lichaam Bonaire, hunto ku diferente organisashon regional i internashonal di salubridat, ta informá ku e riesgo di Hantavirus pa Boneiru i e region karibense ta konsiderá abou na e momentu akí.

E atenshon internashonal riba e virus a surgi despues ku diferente kaso serio a wordu reportá abordo di e barku krusero MV Hondius, ku a nabegá den Sur-Amérika i oséano Atlántiko. Segun reportenan internashonal, algun pasahero i miembro di tripulashon a bira gravemente malu i tambe tin personanan ku a fayesé. E situashon a yega na atenshon di paisnan manera Hulanda i Merka, unda outoridatnan di salubridat tambe ta sigui e desaroyo di e kasonan.

Boneiru, Kòrsou i Aruba ta sigui alerta

GGD Boneiru a deklará ku no tin ningun kaso konfirmá di Hantavirus na Boneiru ni señalnan ku e virus ta plamá den e region karibense. E organisashon ta sigui e situashon den kolaborashon ku Caribbean Public Health Agency, RIVM i World Health Organization.

Na Kòrsou, Ministerio di Salubridat, Medio Ambiente i Naturalesa a informá ku tambe no tin menasa direkto pa e isla, pero ku nan ta mantené monitoreo preventivo, spesialmente ku barkunan krusero den e area.

Na Aruba, Directie Volksgezondheid Aruba a indiká ku no tin motibu di preokupashon pa e isla i ku aktualmente no tin ningun kaso registrá.

Outoridatnan di salubridat den region ta sigui monitoreando e situashon internashonalmente i ta pidi komunidat pa keda trankil, ya ku e riesgo di propagashon den Karibe ta konsiderá limitá.

Kiko ta Hantavirus?

Hantavirus ta un virus ku normal ta transmití pa medio di kontakto ku urina, sushi, saliva òf fekalia di sierto tipo di raton òf djaka infektá. Kontaminashon por sosodé, por ehèmpel, dor di inhalá stòf den lugánan kaminda e "knaagdier" infektá a laga restonan atras.

Segun ekspertonan di salubridat, transmishon di hende pa hende ta straño i solamente ta sosodé den situashonnan spesífiko di kontakto hopi serka i prolongá.

E variante di e virus ku a wordu identifiká den e brote resiente ta relashoná ku sierto tipo di roedor salbahe ku ta biba prinsipalmente den Chile i Argentina. Segun outoridatnan, e tipo di roedor aki no ta presente na Boneiru, Kòrsou ni Aruba.

Advertisement