Hóben belero boneriano Rocquí Martis a kompletá ku éksito un trayekto intensivo di entrenamentu entre Kas di Regatta i Sorobon, ku regreso na Kas di Regatta, komo parti di su preparashonnan pa Kampionato Mundial 2026 na St. Croix.

E seshon di entrenamentu a dura aproksimadamente 8 ora, inkluyendo un ora di pouse, i a sirbi komo un prueba di resistensia físiko i mental. Segun Martis, e obhetivo prinsipal tabata pa sigui konstruí e kondishon nesesario pa kompetí na nivel internashonal i prepará pa eksigensianan ku e kampionato mundial ta presentá.

Advertisement

E entrenamentu tabata parti di su programa intensivo di preparashon i el a keda kompañá pa su entrenador i kompañero di ekipo, Dedrie Pedersen, kende tin un ròl importante den su desaroyo komo atleta.

Enfoke riba mehorashon

Despues di su partisipashon na e Kampionato Mundial 2025 na Ecuador, kaminda Martis a finalisá na e puesto 76, e hóben deportista a pone su meta riba sigui mehorá su prestashonnan i alkansá un resultado mas fuerte durante e próksimo mundial.

“Kada entrenamentu ta un oportunidat pa siña i krese,” Martis a deklará. “E trayekto aki no tabata solamente tokante kubri e distansia. E tabata tokante desaroyá resistensia físiko i mental ku mi lo mester pa kompetí ku e mihó beleronan di mundu.”

Segun Martis, su meta ta pa yega na St. Croix den novèmber 2026 mas prepará, mas fuerte i ku mas eksperensia ku den su partisipashon anterior.

Aparte di su preparashon deportivo, Martis ta sigui trahariba su inisiativa Pebble in Motion, ku tin komo meta inspirá hóbennan na Boneiru pa sigui nan sueñonan den deporte di nabegashon.

Dor di kompartí su progreso, entrenamentunan i kompetensianan, e ta spera di motivá e próksimo generashon di deportistanan lokal pa invertí den disiplina, perseveransia i trabou duru.

“Mi ke mustra ku dedikashon i perseveransia bo por yega leu, mas ora bo ta kuminsá riba un isla chikí manera Boneiru,” Martis a bisa.

Ku ménos di un aña pa bai promé ku e Kampionato Mundial na St. Croix, Martis ta sigui ku un programa di entrenamentu intensivo ku ta inkluí seshonnan di resistensia, tèknika i preparashon físiko.

E deportista ta invitá komunidat pa sigui su trayekto dor di su plataformanan di ret sosial, kaminda e ta publiká aktualisashonnan tokante su entrenamentu, kompetensia i preparashonnan rumbo pa e kampionato mundial.

Pa Rocquí Martis, kada entrenamentu i kada miya náutiko ku e nabegá ta un paso mas den su meta di representá Boneiru ku orguyo riba esenario internashonal.