Lider di Frakshon Serberie, Salma Serberie, a ekspresá su evaluashon i preokupashonnan profundo relashoná ku e último kambionan polítiko den Kolegio Ehekutivo di Boneiru. Serberie a boga pa transparensia i un solushon rápido pa garantisá stabilidat den gobernashon di nos isla.

Sra. Serberie a deklará ku e retiro di diputado Joselito Statia tabata un sorpresa total p'e i ku e no ta di akuerdo ku e fásil ku a tuma e desishon akí. Segun e, e problema prinsipal tabata falta di komunikashon i no e funshonamentu di Statia debernan komo diputado. Serberie a elogiá e trabou di e eks-diputado, destakando ku Statia tin un bon nòmber asta na Hulanda. El a enfatisá ku mester a konfrontá e situashon na mesa pa bini ku un solushon huntu en bes di opta pa su retiro.

Banda di esaki, Serberie a ekspresá su desaprobashon fuerte pa e forma kon tabata ke manehá postulashon pa un diputado nobo den Kolegio Ehekutivo. El a enfatisá riba e falta di transparensia den e proseso i a splika ku e no por a duna su voto di konfiansa na Roy Martina pa remplasá Statia. Segun Serberie, un funshon asina importante ta rekerí un análisis mas profundo di e kandidato promé ku por a bini ku un votashon.

Mirando e panorama aktual, Salma Serberie a mustra su preokupashon pa e echo ku un "gobernashon di minoria" no ta e mihó kaminda pa Boneiru kaná p'e. Pa evitá ku e isla ta drenta den un krísis polítiko mas profundo, e lider di frakshon ta hasi un yamada serio na e partidonan UPB i MPB. Segun Serberie, e partidonan akí mester sinta na mesa mas pronto posibel i yega na un akuerdo pa asina garantisá un mayoria stabil i un gobernashon fuerte pa pueblo di Boneiru.

Advertisement