Selekshon di futbòl di Boneiru a keda derotá den Concacaf Nations League 2026-2027, 3-2 kontra St. Kitts and Nevis. E partido a tuma lugá na Estadio La Polar na Havana, Cuba, djamars 17 di novèmber.
Boneiru a kuminsá e partido di forma positivo i a logra tuma kòntròl di e resultado den promé mitar. Na minüt 28, Myron Bostdorp a habri e skor pa Boneiru despues di un pase di Freadyen Michiel. Ocho minüt despues, na minüt 36, Thierry Anthony a oumentá e bentaha na 2-0, despues di un asistensia di Myron Bostdorp.
Sinembargo, promé ku e promé mitar a kaba, St. Kitts and Nevis a logra redusí e desbentaha. Harry Panayiotou a marka e promé gol pa su ekipo na minüt 43, hasiendo e skor 2-1 na final di e promé mitar.
Den di dos mitar, St. Kitts and Nevis a sigui buska e empate i na minüt 49 Tiquanny Williams a konvertí un penal pa pone e partido 2-2. Despues di vários intento, e mesun Williams a bolbe marka na minüt 74, despues di un pase di Omari Sterling-James, pa duna St. Kitts and Nevis e bentaha definitivo di 3-2.
Boneiru a sigui lucha pa bolbe den e partido, pero no a logra haña e gol di empate. Na minüt 87, Railey Martijn a risibí un karchi kòrá, lagando Boneiru den e último fase di e partido ku dies hungadó.
Ku e resultado aki, Boneiru ta finalisá su partisipashon den Grupo C di League B na di kuater lugá, ku un total di 3 punto den seis partido. E selekshon a logra un viktoria i a sufri sinku derota, markando kuater gol i risibiendo diesdos.
E último puesto den grupo ta nifiká ku Boneiru ta degradá pa League C, di akuerdo ku e sistema di promoshon i relegashon di Concacaf. E sistema ta stipulá ku e ekipo ku finalisá na kuater lugá den kada grupo di League B ta baha pa e siguiente nivel.
Pa Boneiru, esaki ta nifiká ku e siguiente partido den Concacaf Nations League lo kuminsá den League C, kaminda e selekshon lo tin e oportunidat pa lucha pa un puesto di promoshon di regreso na League B.
Segun e kalènder di Concacaf, e siguiente fase di grupo di e kompetensia ta programá pa 22–30 di mart. Sin embargo, e grupo i e kontrinkantenan di Boneiru pa e siguiente edishon ainda mester wòrdu konfirmá.
Kargando komentarionan...